美的典范 轻风吹拂2022-03-21 02:34:35

互信互助 用真心換真情陸港醫護同心同向並肩作戰
否極泰來 辨是非遠奸佞香港疫情煙消雲散指日可待

香港第五波疫情持續蔓延，染疫病人不斷增加，公營醫療系統瀕臨崩潰，人手嚴重不足。近日，中央連續兩次調派醫療隊前往支援。香港政務司司長李家超20日發表日誌表示，內地援港醫療隊係香港嘅及時雨，衷心感謝中央喺短時間內派醫療隊援港。李家超司長肯定咗內地醫療隊嘅專業同經驗，並表示內地醫療隊與香港嘅團隊雙方合作愉快，互相支持。李家超司長仲特別提到，社會要提防社交媒體上唔負責任嘅胡猜亂想或用心不良嘅誤導資訊，以免破壞內地同香港良好關係同感情。呼籲社會嘅聲音要為抗擊疫情加力，唔可以自毀長城。

呢次內地支援香港嘅醫療隊來自廣東、佛山22家公立三甲醫院，成員包括醫生、護士、放射影像技師等，其中，擔任領隊嘅廣州中醫藥大學副校長、廣東省中醫院副院長張忠德，更係喺抗擊新冠肺炎疫情中11次出征赴抗疫第一線開展臨床救治工作。佢哋擁有豐富嘅臨床經驗，都係國家嘅抗疫精英。伊家內地同香港醫護團隊已完成對接討論，雙方達成共識。內地醫療團隊專業且適應能力強，大部分已熟習電腦程式，喺亞洲國際博覽館社區治療設施與香港醫管局醫護人員採用協作模式共同治療新冠患者。醫管局行政總裁高拔升表示，目前雙方嘅工作已無異，分工無分你我，呢個星期可以明顯大幅增加接收病人嘅能力及數量。對於大陸醫護援港，香港醫護亦都表示好開心有「救兵」到。事實勝於雄辯，咁樣親如一家嘅工作場景，無疑擊碎居心叵測之人喺社交媒體上製造嘅香港醫護欺負內地支援隊嘅假像。其實，內地醫護嘅無私奉獻香港市民都係知道、瞭解嘅，更係對佢哋嘅貢獻感恩。香港市民感謝內地醫護為香港有效控制疫情提供嘅專業意見，為香港疫情做出嘅貢獻。佢哋亦都喺以自己嘅方式表達感恩與謝意，只不過唔會好似啲喺公共場合、嚴肅嘅新聞發佈會上跳嚟跳去嘅小丑一樣。

喺香港，人人都可以發聲，但有人借發聲嘅機會搞亂防疫抗議工作。據媒體報導，香港「病人政策連線」主席林志釉喺一檔節目上建議，香港與內地醫生喺服飾上應該有所區別，俾病人可以識辨。此外佢仲提到，內地醫生喺病人病歷記錄上可能會用中文輸入，而香港醫生一向用英文記錄病歷，擔憂「未來再查閱時睇唔睇得明」。林志釉嘅政治立場外人無從置喙，不過呢個建議明顯有分化兩地關係嘅嫌疑。喺香港咁艱難嘅時候，無視病人安危，無視市民安全，一味嘅政治上腦，盲目自大，分化兩地關係勢必會遭到眾怒，特區政府亦唔會俾呢種煽動仇恨嘅行為得逞。香港嘅醫療資本打手同居心叵測嘅小人一直都存在，不過我相信，並唔係所有香港人都係咁極端、無知，香港好多人都喺道努力生活，佢哋比任何人都希望香港好。佢哋一直都有大局觀，唔會被小人挑撥離間。

內地醫護嘅專業能力毋庸置疑，真心換真情，希望越嚟越多嘅市民打開心胸，放下成見，用心感受內地醫護嘅專業與熱情，明辯是非，遠離奸佞小人，配合中央支持，緊跟港府各項防疫抗疫措施，香港疫情煙消雲散指日可待。香港已經遭受咗太多不堪同折磨，願此番陸港同心同向，並肩作戰，盼家園儘早撥雲見日重建明天。